Monthly Archives: March 2008

تتمّہ

میں نے 15 مارچ کو اسلام آباد میں ہونے والے دھماکے کی اطلاع دیتے ہوئے لکھا تھا “ان 10 کے علاوہ 4 زخمی افراد نے پاکستانی ہسپتال جانے سے انکار کیا اور کہا کہ “ہمیں ہمارے سفارتخانہ پہنچا دو”۔ سو انہیں وہاں موجود لوگوں نے ان کے سفارتخانہ پہنچایا ۔ یہ امریکی تھے اور شاید ان میں کوئی برطانوی ہو “۔

مندرجہ بالا فقرہ لکھتے ہوئے میرے ذہن میں تھا کہ وہ لوگ امریکی ایف بی آئی کے ہوں گے ۔ اب یہ بات پوری طرح واضح ہو چکی ہے کہ وہ چاروں کے چاروں امریکی ایف بی آئی کے لوگ تھے ۔ مزید یہ کہ اُنہیں وہاں موجود لوگ امریکی سفارتخانہ نہیں لے کر گئے تھے کیونکہ اُنہوں نے کسی پاکستانی کے ساتھ جانے سے انکار کر دیا تھا ۔ امریکی سفارتخانہ سے گاڑیاں بہت جلد پہنچ گئی تھیں جو اُن کو لے کر چلی گئیں تھیں ۔ یہ معلوم نہیں ہو سکا کہ اُن چار امریکی زخمیوں کا علاج کہاں ہو رہا ہے ۔ باقی 7 امریکی زخمی جو سروسز ہسپتال اسلام آباد میں تھے کو بھی 15 اور 16 مارچ کی درمیانی رات امریکی سفارتخانہ والے لے گئے تھے ۔

یہ بھی سننے میں آیا ہے کہ لاہور ایف آئی اے کی عمارت کے جس حصہ سے خودکُش بمبار نے ٹرک ٹکرایا اور ماڈل ٹاؤن میں خودکُش بمبار نے جس کوٹھی کو نشانہ بنانا چاہا ان دونوں میں ایف بی آئی والے بیٹھتے تھے ۔ ان باتوں سے یہ تاثر اُبھرتا ہے کہ دو سال قبل جو خبر پاکستان میں گردش کر رہی تھی کہ پورے پاکستان میں ایف بی آئی موجود ہے وہ صحیح تھی ۔

معاشرہ ۔ ماضی اور حال

معاشرہ میں خود بخود بگاڑ پیدا نہیں ہوتا بلکہ معاشرہ کے افراد ہی اس کا سبب ہوتے ہیں ۔ ایک دو نہیں سب مجموئی طور پر اس کے حصہ دار ہوتے ہیں ۔ کوئی غلط اقدام کر کے ۔ کوئی اس کی حمائت کر کے اور کوئی اس پر آنکھیں بند یا خاموشی اختیار کر کے ۔ 1970ء تک ریڈیو پر دلچسپ اور سبق آموز ڈرامے ہوتے تھے ۔ ریڈیو پر مزاحیہ پروگرام بھی ہوتے تھے لیکن ان میں بھی تربیت کو مدِ نظر رکھا جاتا تھا ۔ اِن میں نظام دین سرِ فہرست تھا ۔ چوہدری نظام دین کے ٹوٹکے اور نُسخے مزاحیہ لیکن دُور رس تربیت کے حامل ہوتے تھے ۔

اُس زمانہ میں کئی مووی فلمیں ایسی ہوتیں کہ لوگ اپنے بیوی بچوں سمیت دیکھنے جاتے ۔ ان کو سماجی فلمیں کہا جاتا تھا ۔ ان میں بُرے کا انجام بُرا دکھایا جاتا اور آخر میں سچے یا اچھے کو کامیاب دکھایا جاتا ۔ اسی طرح کچھ گانے بھی سبق آموز ہوتے تھے جو بہت پسند کئے جاتے جن میں سے چند کے بول اس وقت میرے ذہن میں آ رہے ہیں

سو برس کی زندگی میں ایک پل تو اگر کر لے کوئی اچھا عمل

جائے گا جب جہاں سے کچھ بھی نہ پاس ہو گا

انسان بنو کر لو بھلائی کا کوئی کام

اک دن پڑے گا جانا کیاوقت کیا زمانہ ۔ کوئی نہ ساتھ دے گا سب کچھ یہیں رہے گا

دنیا ایک کہانی رے بھیّا ۔ ہر شئے آنی جانی رے بھیّا

میری نوجوانی کے زمانہ یعنی 1960ء یا کچھ پہلے ایک گانا آیا جو عاشق نے محبوبہ کا حصول نہ ہونے پر گایا تھا

کسی چمن میں رہو تم بہار بن کے رہو ۔ ۔ ۔ خدا کرے کسی دل کا قرار بن کے بن کے رہو
ہمارا کیا ہے ہم تو مر کے جی لیں گے ۔ ۔ ۔ یہ زہر تم نے دیا ہے تو ہنس کے پی لیں گے
تمہاری راہ چمکتی رہے ستاروں میں ۔ ۔ ۔ دیارِ حُسن میں تم حُسنِ دیار بن کے رہو

ایک دہائی بعد شاعروں کا دماغ پلٹا تو اُسی طرح کی صورتِ حال میں یہ گانا آیا

قرار لُٹنے والے تُو قرار کو ترسے ۔ ۔ ۔ میری وفا کو میرے اعتبار کو ترسے
خُدا کرے تیرا رنگیں شباب چھِن جائے ۔ ۔ ۔ بہار آئے مگر تُو بہار کو ترسے

اُس زمانہ میں تعلیم سے زیادہ تربیت پر زور دیا جاتا ۔ تعلیم کا بھی کم خیال نہیں رکھا جاتا تھا اور بامقصد تعلیم کی خواہش کی جاتی تھی ۔ زیادہ تر سکولوں کے اساتذہ سلیبس یا کورس کے علاوہ پڑھاتے تھے اور چلنے پھرنے بولنے چالنے کے آداب پر بھی نظر رکھتے تھے ۔ عام سلیبس کے علاوہ طُلباء کو معلوماتِ عامہ ۔ ابتدائی طبی امداد اور ہوائی حملہ سے بچاؤ کے کورسز کرنے کی ترغیب دی جاتی ۔ میں نے دو معلوماتِ عامہ کے دو ابتدائی طبی امداد کے اور ایک ہوائی حملہ کے بچاؤ کا امتحان آٹھویں سے دسویں جماعت تک اے گریڈ میں پاس کئے تھے ۔ ابتدائی طبی امداد اور ہوائی حملہ سے بچاؤ کی عملی تربیت دی جاتی تھی جو میں نے آٹھویں ۔ نویں اور اور دسویں کی گرمیوں کی چھٹیوں میں حاصل کی ۔

شاید 1959ء کا واقعہ ہے جب میں انجنیئرنگ کالج لاہور میں پڑھتا تھا ۔ میں اپنے ایک استاذ کے گھر مشورہ کیلئے گیا تو وہاں ایک صاحب اپنے بیٹے سمیت موجود تھے ۔ چند منٹ بعد وہ چلے گئے تو محترم اُستاذ نے فرمایا “ان صاحب کا بیٹا ہمارے کالج میں دوسرے سال میں ہے ۔ یہ کہہ رہے تھے کہ “میں نے بیٹے کو یہاں بھیجا تھا کہ پڑھائی کے ساتھ ساتھ یہ انسانیت بھی سیکھ لے گا ۔ یہ انجنیئر تو شاید بن جائے گا لیکن انسان بننے کی بجائے جانور بنتا جا رہا ہے ۔ اتنے اعلٰی معیار کے کالج میں پہنچ کر اس دماغ آسمان پر چڑھ گیا ہے اور اسے بڑے چھوٹے کی تمیز نہیں رہی”۔

میرے سکول کالج کے زمانہ میں اساتذہ کی تنخواہیں بہت کم ہوتی تھیں ۔ اساتذہ کی اکثریت گو زیادہ پڑھی لکھی نہیں ہوتی تھی لیکن اپنے فرائض سے نہ صرف واقف ہوتے تھے بلکہ انہیں بخوبی نبھاتے بھی تھے ۔ وہ اپنے طُلباء سے دلی لگاؤ رکھتے تھے اور اپنے آپ کو اُن کا سرپست سمجھتے تھے ۔ طُلباء اور ان کے والدین بھی اساتذہ کی تعظیم کرتے تھے جس کا بچوں پر مثبت اثر پڑتا تھا ۔ والدین کو استاذ سے کوئی شکائت ہوتی تو علیحدگی میں اس سے بات کرتے اور بچے کو خبر نہ ہوتی ۔ استاذ بھی والدین کو طالب علم کی شکائت اسکے سامنے کی بجائے علیحدگی میں کرتے ۔

اس میں کوئی شک نہیں کہ بُرے لوگ اُس زمانہ میں بھی تھے لیکن آج کی طرح اکثریت ہم چُناں دیگرے نیست مطلب ہم جیسا کوئی نہیں والی بات نہ تھی ۔ کم پڑھے اور اَن پڑھ لوگ پڑھے لکھے کی عزت کرتے تھے خواہ وہ ان سے چھوٹا ہو اور پڑھے لکھے مؤدبانہ طریقہ سے بات کرتے تاکہ دوسرے کو معلوم ہو کہ وہ تعلیم یافتہ ہے ۔

آج میں دیکھتا ہوں کہ پڑھا لکھا اکڑ میاں بنا پھرتا ہے اور دوسرے کو حقیر جانتا ہے ۔ تُو تُو کر کے بات کرتا ہے ۔ بڑی گاڑی والا پرانی یا چھوٹی گاڑی والے کو حقیر سمجھتا ہے ۔ میریئٹ یاکے ایف سی سے نکلنے والا باہر کھڑے پر حقارت کی نظر ڈالتا ہے ۔ متعدد بار میرے ساتھ ایسا ہوا کہ میں عام سے لباس میں تھا اور میرےساتھ بدتمیزی کی کوشش کی گئی اور جب میں نے انگریزی بولی تو صاحب بہادر یا محترمہ کی زبان گُنگ ہو گئی ۔ [وضاحت ۔ انگریزی بولنے کا مطلب ہے کہ ایک تعلیم یافتہ ۔ مدبّر اور مہذّب انسان کی طرح بات کی ۔ یہ فقرہ انجنیئرنگ کالج سے لے کر اب تک میرے دوستوں میں اِن معنی میں مستعمل ہے]

یہ کمپیوٹر کے دور کا معاشرہ جس میں جھوٹ اور ظُلم کی بہتات ہے اس کے سُلجھنے کی شاید کسی کو اُمید ہو مجھے تو مایوسی ہی مایوسی نظر آتی ہے ۔ وجہ یہ کہ چالیس پچاس سال قبل جو جانتا تھا وہ بھی دوسرے کی بات غور سے سنتا تھا کہ شاید کوئی نئی بات سیکھ لے ۔ آج کے دور میں اکثر لوگ شاید یہ سمجھتے ہیں کہ ان سے زیادہ کوئی نہیں جانتا اسلئے دوسرے ان کو کچھ نہیں سِکھا سکتے بلکہ دوسروں کو اُن سے سیکھنا چاہیئے ۔

دھماکہ ۔ سکیوریٹی سخت ۔ ذمہ داری ختم

آج رات 8 بج کر 40 منٹ پر اسلام آباد سیکٹر ایف ۔ 6 کے مرکز کے پاس ایک لَونا کیپرِس [Luna Capresse] نامی ریستوراں میں بم دھماکہ ہوا ۔ دھماکے کی جگہ ہمارے گھر سے 2 کلو میٹر یا کم فاصلہ پر ہے ۔ اس دھماکہ میں 19 افراد زخمی ہوئے جن میں سے دو ہلاک ہو چکے ہیں جو غیر مُلکی تھے ۔ مزید 3 شدید زخمی ہیں جن میں سے دو پاکستانی ہیں ۔ زخمیوں میں 7 امریکہ ۔ ایک کینیڈا اور ایک آسٹریلیا کا باشندہ ہےاور شائد ایک جاپان کا باشندہ ہے ۔ ہلاک ہونے والوں میں ایک عورت ہے جو امریکہ کے سفارتخانہ میں نرس تھی ۔ ان 10 کے علاوہ 4 زخمی افراد نے پاکستانی ہسپتال جانے سے انکار کیا اور کہا کہ “ہمیں ہمارے سفارتخانہ پہنچا دو”۔ سو انہیں وہاں موجود لوگوں نے ان کے سفارتخانہ پہنچایا ۔ یہ امریکی تھے اور شاید ان میں کوئی برطانوی ہو ۔

یہ افسوسناک واقعہ ہے ۔ اس سے چند دن قبل لاہور کے دھماکوں نے حشر کا سا سماں بنا دیا تھا ۔ جس کے بعد حکومت کے کی طرف سے بیان پر بیان آ رہا تھا کہ سکیورٹی سخت کر دی گئی ہے ۔ لاہور دھماکوں کے بعد سیکیورٹی کی خاطر سیکڑوں افراد گرفتار کئے گئے ۔ 17 مارچ کو ہونے والے قومی اسمبلی کے اجلاس کے سلسلہ میں سکیورٹی کے حوالے سے درجنوں افراد راولپنڈی اسلام آباد سے دہشتگرد یا مشکوک قرار دے کے گرفتار کئے گئے ۔ نتیجہ صفر کا صفر ۔

پرویز مشرف کی حکومت کا صرف اتنا فرض رہا کہ ہر دھماکے بعد اس کی مذمت کی جائے ۔ پھرکہا جائے کہ سکیورٹی کے انتظامات سخت کر دئیے گئے ہیں اور مُجرموں کو کیفرِ کردار تک پہنچایا جائے گا ۔ اس کے بعد اپنے کام میں لگ جاؤ جس کا آقا بُش نے حُکم دے رکھا ہے ۔ پرویز مشرف کی گُڈ گورننس نے یہ حال کر دیا ہے کہ مُلک کا کوئی حصہ محفوظ اور کوئی فرد نہیں سوائے پرویز مشرف اور اس کے چمچہ گیروں کے ۔

نُقطہ اور نُکتہ

کچھ تو اُردودانوں نے ہی الفاظ کے استعمال میں احتیاط نہ برتی ۔ مثال کے طور پر لفظ “دقیانوسی” اس کی ایک مثال ہے ۔ دقیانوسی بنا ہے دقیانوس سے جو پرانے زمانہ میں بہت ظالم و جابر اور پتھر دل بادشاہ تھا ۔ دقیانوس ہر شخص کو اپنا مکمل تابع رکھتا ۔ ایسا نہ کرنے والے انسان کو وہ اذیتیں دے دے کر مارتا تھا ۔ کچھ نیک لوگوں [اصحابِ کَہْف] کو اسی کے ظُلم سے بچانے کیلئے اللہ سبحانُہُ و تعالٰی نے ایک صدی سے زائد ایک غار میں سُلا کر چھُپا دیا تھا ۔ دقیانوسی کا مطلب پُرانا یا پُرانے زمانے کا لینا کہاں تک درست ہے ؟

مگر ہماری قوم نے تو کسی بھی قومی چیز کے ساتھ اچھا سلوک نہیں کیا ۔ اس کا مشاہدہ کرنا ہو تو کسی سڑک ۔ گلی ۔ محلہ ۔ باغ یا عوامی عمارت میں چلے جائیے اور وہاں فرزندانِ قوم کی کارستانیاں ملاحظہ فرمائیے ۔ میں سمجھتا تھا کہ یہ کارستانیاں اَن پڑھ یا غریب لوگ کرتے ہوں گے لیکن تجربہ نے بتایا کہ یہ کارنامے کرنے والوں کی اکثریت پڑھے لکھے اور کھاتے پیتے لوگوں پر مشتمل ہے اور ان میں صرف مرد اور لڑکے ہی نہیں صنفِ نازک بھی برابر کی شریک ہے ۔ سب اپنی اپنی حسرتیں اس مُلک کی بگاڑ پر نکالتے ہیں ۔ کوئی پودا ۔ کوئی درخت ۔ کوئی کھمبا ۔ کوئی دیوار ۔ کوئی خالی پلاٹ حتٰی کہ کوئی چیز یا جگہ محفوظ نہیں ۔ معاف کیجئے گا ۔ شاید بوڑھا ہو گیا ہوں اسلئے بھولنے لگا ہوں ۔ کوئی شریف لڑکی لڑکا عورت یا مرد بھی محفوظ نہیں رہا ۔ 

قومی زبان پر بھی ہماری قوم کی اکثریت نے زور آزمائی کی ہے اور متواتر پچھلے ساٹھ سال سے کی ہے ۔ معلوم نہیں سندھی اور پشتو کا کیا حال ہے البتہ اب صحیح پنجابی بولنے والے بھی خال خال ہی ملتے ہیں ۔ یہ تو ایک طویل مضمون ہے فی الحال بات صرف نُقطہ اور نُکتہ کی جو اُردو کے اُن الفاظ میں سے ہیں جن کا استعمال آجکل عام طور پر کسی کی سمجھ میں نہیں آتا اور سمجھا جاتا ہے کہ ایک غلط ہے یا دوسرا ۔

عدم توجہی کی وجہ سے اُردو لغت بجائے افزائش کے انحطاط کا شکار ہو چکی ہے ۔ ہمارے ذرائع ابلاغ بالخصوص اخبارات اور رسائل صرف اُردو ہی نہیں انگریزی بھی غلط لکھتے ہیں ۔ اس کا مجموعی اثر عام آدمی پر ہوتا ہے جس کے نتیجہ میں زبان بارے علم محدود ہو گیا ہے اور لوگ الفاظ کے صحیح استعمال سے بیگانہ ہو گئے ہیں ۔

میں ان دو لفظوں میں فرق کو واضح کرنے کی کوشش کرتا ہوں ۔ نقطہ وہ چیز ہے جسے انگریزی میں پوائنٹ [point] کہتے ہیں ۔ اُردو کی طرف سے لاپرواہی کے نتیجہ میں آج سے چار یا پانچ دہائیاں قبل مرتب ہونے والی فیروزاللغات سے بہتر کوئی اُردو کی قاموس [dictionary] نہیں ہے اور فیروزاللغات بھی ایک پہلی کوشش سے زیادہ نہیں ۔ بہر حال فیروزاللغات نقطہ کی تشریح یوں کرتی ہے ۔

نقطہ کا مطلب ہے ۔ بِندی ۔ صفر ۔
نقطہ اشتعال کا مطلب ہے ۔ گرمی اور کھولاؤ کا وہ نقطہ جس پر آگ بھڑک اُٹھے ۔
نقطہ انتخاب کا مطلب ہے ۔ وہ نقطہ جو کسی کتاب کے حاشیہ پر یا کسی عبارت یا شعر پر پسندیدگی کے طور پر لگایا جائے ۔
نقطہ عروج کا مطلب ہے ۔ کمال ۔ انتہاء ۔ انتہائی بلندی ۔
نقطہ کا فرق نہ ہونا کا مطلب ہے ۔ ذرابھی فرق نہ ہونا ۔
نقطہ گاہ کا مطلب ہے ۔ دائرہ کا مرکز ۔
نقطہ لگانا کا مطلب ہے ۔ عیب لگانا ۔ دھبّہ لگانا ۔
نقطہ نظر کا مطلب ہے ۔ دیکھنے یا سوچنے کا انداز ۔

نقطہ کا ہم عصر انگریزی میں پوآئنٹ [point] ہے جس کی انگریزی کی قاموس میں لمبی تفسیریں ہیں جن میں سے چند موٹی موٹی یہ ہیں

(1) an individual detail (2) a distinguishing detail (3) the most important essential in a discussion or matter (4) a geometric element that has zero dimensions (5) a particular place (6) an exact moment (7) a particular step, stage, or degree in development (8) a definite position in a scale

مندرجہ بالا انگریزی تفسیر کا اُردو ترجمہ حسبِ ذیل ہے
1 ۔ ایک انفرادی تفصیل۔ 2 ۔ ایک منفرد تفصیل ۔ 3 ۔ ایک بحث میں سب سے اہم معاملہ ۔ 4 ۔ علمِ ہندسہ کا ایک جُزو جس کی پیمائش صفر ہو ۔ 5 ۔ ایک خاص جگہ ۔ 6 ۔ ایک خاص وقت ۔ 7 ۔ ایک خاص اقدام ۔ 8 ۔ ایک پیمانے میں ایک خاص مقام ۔

نُکتہ کی فیروزاللغات یوں تشریح کرتی ہے ۔

نکتہ کا مطلب ہے ۔ باریک بات ۔ تہہ کی بات ۔ لطیفہ ۔ چٹکلہ ۔ رخنہ ۔ عیب ۔ چمڑا جو گھوڑے کے منہ پر رہتا ہے ۔
نکتہ بیں کا مطلب ہے ۔ نازک خیال ۔
نکتہ چیں کا مطلب ہے ۔ عیب ڈھونڈنے والا ۔
نکتہ دان کا مطلب ہے ۔ ذہین ۔
نکتہ شناس کا مطلب ہے ۔ جچی تُلی بات کرنے والا ۔ ہوشیار ۔ عقلمند ۔

شاید کہ تیرے دِل میں اُتر جائے میری بات

افراطِ زر ۔ اثاثے اور زرِ مبادلہ

میں بار بار کوشش کرتا ہوں کہ صُلح جُو اور ترقی پسند بن جاؤں لیکن وقفہ وقفہ سے کوئی صاحب یا صاحبہ کوئی ذکر چھیڑ کر مجھے ماضی کے راز افشاء کرنے پر مجبور کر دیتے ہیں ۔ 11 روز قبل محمد شاکر عزیز صاحب نے اپنی بلکہ صرف اپنی نہیں میرے سمیت اپنے جیسے لاکھوں نہیں کروڑوں پاکستانیوں کی بِبتا بیان کی ۔

محمد شاکر عزیز صاحب کی ایک بھولی بھالی ننھی بہن نے کہا ” نوٹ تو ہم خود چھاپتے ہیں تو انھیں زیادہ سے زیادہ کیوں نہیں چھاپا جاتا تاکہ سب امیر ہوجائیں؟” ماشاء اللہ کتنا سادہ مگر بہت ہی گہرا سوال ہے ۔ محمد شاکر عزیز صاحب نے جواب دیا ” نوٹ چھاپنے سے پہلے ان کے پیچھے بطور ضمانت سونا رکھا جاتا ہے یا ڈالر یورو رکھے جاتے ہیں”۔ معاشیات کے اصول کے مطابق جواب بالکل درست ہے ۔ لیکن بدقسمتی سے ہمارے ملک میں ایسا نہیں ہو رہا ۔ یہاں اثاثوں سے کئی گنا نوٹ گردش میں ہیں ۔ یہی وجہ ہے کہ امریکی ڈالر جو دسمبر 1971ء سے قبل پونے پانچ روپے کا تھا وہ اب 63 روپے کا ہے ۔ یعنی پاکستانی ایک روپے کی اصل قیمت ساڑھے سات پیسے رہ گئی ہے ۔

میں پہلے بھی لکھ چکا ہوں کہ 1952ء میں ہمارے ایک اُستاذ کہا کرتے تھے “مسلمانوں کی تاریخ بڑی کمزور ہے”۔ ان کا مطلب تاریخ کا مضمون تھا ۔ رسول اکرم صلی اللہ علیہ و آلہ و سلّم کا فرمان ہے کہ “مسلمان ایک بِل سے دو بار ڈسا نہیں جاتا” یعنی مسلمان ایک ہی قسم کا دھوکہ ایک سے زائد بار نہیں کھاتا ۔ ہماری قوم کی اکثریت کو گذرے کل کی بات یاد نہیں رہتی اسی لئے بار بار دھوکہ کھاتے ہیں ۔

میں بھی سرکاری ملازم رہا لیکن کھُلے ذہن کے ساتھ ۔ اللہ سُبحانُہُ و تعالٰی کی بڑی کرم نوازی ہے کہ مجھے غلط کاموں سے بچائے رکھا گو اس کیلئے مجھے دنیاوی طور پر کئی مصائب جھیلنا پڑے ۔ جب بھی بات افراطِ زر کی ہو یا قومی اثاثہ کی تو میرے ذہن میں ایک مووی فلم چلنا شروع ہو جاتی ہے کہ ہمارے مُلک کے سربراہوں اور سرکاری اہلکاروں نے اصل صورتِ حال کو عوام سے مخفی رکھنے کیلئے کیا کیا جتن کئے ۔

مجھے معاشیات کے مضمون سے تھوڑا سا شغف اسلئے ہے کہ جب میں انجنیئرنگ کالج لاہور میں پڑھتا تھا تو مکینکل انجنیئرنگ پڑھنے والوں کو معاشیات کا مضمون بھی پڑھنا پڑھتا تھا ۔ اس کے سالانہ امتحان میں ایک سوال مُلک کے اثاثہ جات اور ذمہ داریوں [Assets and Liabilities ] کے متعلق بھی ہوتا تھا ۔ اُس زمانہ میں سٹیٹ بنک آف پاکستان کی طرف سے ہر ہفتے کے شروع میں ایک اطلاع نامہ [report] شائع کیا جاتا تھا جس میں پاکستان کے کُل اثاثوں اور ذمہ داریوں کا مدوار [heading-wise] میزان اور میزانِ کُل [sub-totals and grand total] دیا ہوتا تھا ۔ مجھے مکمل تو شاید یاد نہیں کیونکہ یہ اطلاع نامہ پچھلے 34 یا 35 سال سے شائع نہیں ہوا مگر اس کی موٹی موٹی مدات مندرجہ ذیل ہوتی تھیں

Statement of Assets and Liabilities

Assets

Reserves
Gold = ———-
Silver = ———
Foreign currency (owned by Government) = ———-
Other = ———

Receivable
Share on partition yet to be paid by India = ———-
Bills = ———-
Loans = ———-
Other = ———-

Total = ———-


Liabilities

Notes in circulation = ———-
Loans = ———-
Payments due = ———-
Other = ———-

Total = ———-

اصول یہ تھا کہ کُل ذمہ داریوں [Total liabilities] کو کُل اثاثہ جات [Total assets] سے زیادہ نہیں ہونا چاہیئے ۔ اگر کسی وقت کُل ذمہ داریاں کُل اثاثہ جات سے زیادہ ہو جائیں تو اس کا جواز بھی اس اطلاع نامہ میں لکھنا ضروری تھا ۔ اور یہ بھی لکھنا کہ صورتِ حال کو کس طرح صحیح حدود میں لایا جائے گا ۔

ہمیں جو سوال امتحان میں دیا جاتا تھا اس میں اس معاشی اطلاع نامہ کو مدِ نظر رکھتے ہوئے ہم نے پاکستان کی مجموعی معاشی صورتِ حال پر تبصرہ کر کے بتانا ہوتا تھا کہ پاکستان معاشی لحاظ سے کیسا جا رہا ہے ؟ اور ہم مزید بہتری کیلئے کیا تجویز کرتے ہیں ۔ دسمبر 1971ء سے قبل ہمارے ملک کی معیشت اتنی مضبوط تھی کہ آپ کسی ترقی یافتہ یا ترقی پذیر ملک میں چلے جائیں تو پاکستانی کرنسی نوٹ ہاتھوں ہاتھ لیا جاتا تھا ۔ 1967ء میں میں جرمنی میں تھا تو صرف آزمانے کیلئے میں ڈریسنر بنک گیا اور وہاں پاکستانی ایک روپے کے نوٹ دکھا کر کہا “مجھے اس کے بدلے جرمن مارک مل جائیں گے ؟” آفیسر نے فوراً میرے ہاتھ سے نوٹ لے کر مجھے ایک روپیہ 18 پیسے کے حساب سے جرمن مار دے دیئے ۔ اس سے قبل ہمارے ایک عزیز حج کرنے گئے تو ایک روپے کا سوا ریال ملا تھا ۔ ایک ہندوستانی روپیہ پاکستانی 80 سے 90 پیسے کا رہتا تھا ۔

یہ اطلاع نامہ جو عوام کو مُلک کی معاشی صورتِ حال سے آگاہ رکھتا تھا آج سے 34 یا 35 سال قبل حاکمِ وقت کے حُکم سے نہ صرف شائع کرنا بند کر دیا گیا بلکہ ان معلومات کو خفیہ کا درجہ دے دیا گیا ۔ اس کے بعد مصنوعی [manufactured] اعداد و شمار کے ذریعہ قوم کو بیوقوف بنانے کا عمل شروع ہوا جو موجودہ دور میں انتہائی عروج پر ہے ۔

قوم کو غلط اعداد و شمار دینے والے ان مجرموں کے ساتھ جو سلوک ہوتا ہے اس سلسلہ میں میرے ذاتی تجربات میں سے صرف ایک یہ ہے ۔ یکم جولائی 1969ء کو مجھے ترقی دے کے ایک سرکاری کارخانے کا پروڈکشن منیجر لگا دیا گیا ۔ 1970ء میں میرے جنرل منیجر کا تبادلہ ہو گیا اور ان کی جگہ دوسرے صاحب تعینات کر دیئے گئے ۔ سرکاری دفاتر اور کارخانوں میں سیاست گھُس آنے اور اعلٰی سطح کی منیجمنٹ کے غلط اقدامات کی وجہ سے پیداوار کم ہو چکی تھی ۔ پیداوار کی جو رپورٹ اُوپر بھیجی جاتی تھی اس پر میرے دستخط ہوتے تھے ۔ نئے جنرل منیجر صاحب اپنی واہ واہ کروانا چاہتے تھے ۔ اُنہوں نے مجھے حکم دیا کہ میں پیداوار کی رپورٹ میں اُن پرزوں [components] کو بھی شامل کروں جو ابھی اسیمبل [assemble] ہونا تھے ۔ میں نے انہیں سمجھانے کی کوشش کی کہ صرف وہ مال گِنا جاتا ہے جسے مکمل اسیمبل ہونے کے بعد حتمی طور پر [finally] آرمی انسپکٹرز [Army Inspectors] نے قبول [pass] کیا ہو ۔ دوسرے آج اگر ہم ان پرزوں کو گِن لیں گے تو کل کیا کریں گے ؟ نتیجہ یہ ہوا کہ انہوں نے میرا تبادلہ کروا دیا اور میری جگہ ایک جی حضوریہ [yes man] لگوا لیا ۔ پھر پیدا وار کی بڑھا چڑھا کر مصنوئی [manufactured] رپورٹیں بھیجی جاتی رہیں ۔ چھ سات ماہ بعد فوج کے متعلقہ محکمہ سے فوج کے جنرل ہیڈ کوارٹر سے ہوتا ہوا خط پاکستان آرڈننس فیکٹریز کے چیئرمین کو آیا کہ جتنی پیداوار رپورٹوں میں دکھائی گئی ہے اس سے بہت کم ہمیں موصول ہوئی ہے اسلئے بقایا مال فوری طور پر بھیجا جائے ۔ یہ چٹھی چلتے چلتے میرے انہی جنرل منیجر صاحب کے پاس پہنچ گئی ۔ اُن جنرل منیجر صاحب کو سزا یہ دی گئی کہ اُنہیں ڈیپوٹیشن [deputation] پر سعودی عرب بھیج دیا گیا جہاں سے وہ 9 سال کے بعد کروڑ پتی بن کر لوٹے اور واپس آتے ہی انہیں ایک ترقی دے دی گئی ۔

چَوندی چَوندی

پنجابی میں تازہ بتازہ کو چَوندی چَوندی کہتے ہیں یعنی ٹپکتی ہوئی جیسے گرم گرم جلیبیوں میں سے شیرہ ٹپک رہا ہوتا ۔ تو تازہ ترین خبر یہ ہے کہ بالآخر صدر پرویز مشرف نے 17 مارچ 2008ء کو قومی اورصوبائی اسمبلیوں کے اجلاس بُلا لئے ہیں ۔ سُنا یہ گیا تھا کہ صدر کو جو سمری بھیجی گئی تھی اس میں اس ہفتہ کے دوران قومی اور صوبائی اسمبلیوں کے اجلاس بُلا نے کی سفارش کی گئی تھی ۔ بہرکیف بُلا تو لئے ۔